Social Media Marketing kya hai aur kaise karte hai? SMM in Hindi


Aaj digital marketing ke is series mein hum samjhenge ki Social media marketing kya hai aur ye kaise kiya jaata hai. Social media marketing ek powerful tool hai aapke liye to mai recommend karunga ki aap ise acche focus ke saath samajhiye. Agar abhi focus nahi kar sakte ho kyunki kuch aur zaruri kaam kar rahe ho to baadme aake dekh lena video ko.

To aakhir social media marketing hai kya. Social media marketing mein social media platforms aur websites ka istamaal kiya jaata hai product ya service ko promote karne ke liye, apni brand awareness badhaane ke liye aur bhi kaafi cheezein karne ke liye. Social media to aap sab use karte honge aur social media marketing sunne mein easy lagta hoga shayad par ye itna easy hai nahi. Sirf social media sites par pages bananese nahi hoti social media marketing. Isme aapko acche results tab hi mil payenge jab aap ise acchi tarah implement kar payenge.

Social media marketing strategy mein marketing campaign manage karna hota hai, governance, scope set karna hota hai aur aapki company ki manchahi social media culture aur awaz ko set karna hota hai.

Social media platforms ke alag alag purpose ho sakte hai. Jaise facebook ka main aim hai friends aur relatives ko connect karna. Linkedin ka main aim hai working professionals aur colleagues ko connect karna. Youtube ka purpose hai video sharing. To aise kaafi alag alag type ke social media platforms hai. Social media platforms jo kaafi famous hai wo hai facebook, youtube, instagram, twitter, linkedin, Snapchat, Pinterest

Social media websites consumers ko madhyam pradaan karte hai unki zaruratein, shikaytein ya feedback ko online express karne ka.

Companies social media marketing ke zariye apne products ke liye ek buzz create kar sakti hai. Sales leads bhi generate kar sakte hai aap Social Media Marketing ke zariye.

Kaafi cases mein Social media marketing ka istamaal karte hue companies agar marketer dwaara tayyar kiye hue advertising copies nahi istamaal karna chahti hai to customers aur Internet users ke post kiye hue content bhi use kar sakti hai. Yaani user-generated content jaise for example online comments, product reviews, etc. Companies users ko ye cheezein post karne ke liye allow kar sakti hai. To isme unhe kaafi content free mein mil sakta hai kyunki ye content unko customers ya users se mila hai.

Smm karne ke liye kuch basic steps aapko bata deta hu:

1. Apne liye sahi social network chuniye
Social media sites bahut saare hai par aapke liye kaunse zyaada suitable aur faydemand hai ye aapko samajhna hoga. Aadhe man se social media marketing karke aapko zyaada response nahi mil sakega. Bhale hi aap sabhi social media platforms par na ho lekin jitne bhi social media platforms par ho unko sahi tarike se implement kijiye. Har social media platform par aapko profile ka jo section hota hai use thik se fill karna hoga. Waha aap likhiye ki kyu logon ko aapko follow ya subscribe karna chahiye. Agar aapka business B2B hai to aapke liye linkedIn jaise platforms suitable honge.

Kuch saalon pehle social media marketing karna itna tough nahi tha. Par aaj aap dekhiye competition kitna badh gaya hai. Itne saare social media pages mein se aapki page ko logo tak pahuchana mushkil to hai

2. Apna Target audience decide kijiye
Kya hai aapka target audience? Kya wo students hai? Parents hai? Ya office goers hai? Apne target audience ke jo features hai wo aap decide kijiye. Phir uske basis par hi to aap waisa content bana payenge na jo unko accha lage ya unke kaam aye. Dekhiye kaafi factors aapko considers karne padenge target audience decide karne ke liye jaise age, interest, occupation ityadi.

3. Apni positioning strategy chuniye-
Kis tarah ka content aap banayenge. Aap kab kab apna content post karenge. Content ke bahut se types hote hai. Haan aap different types ke content bana sakte hai lekin decide kijiye ki kin types ke content par aap mainly focus karna chahte hai. Phir apne social media page ko us tarah position karne ki koshish karen apni campaigns ke dwaara.

4. Logon ke saath connect kijiye
Social media sites ka to maksad hi hota logon ko connect karwana. Agar aap logon se connect hi nahi kar pa rahe ho to social media marketing ka kya fayda. To kaise karenge connect logon se? Iske kuch tarike aapko batata hun. Sabse pehle to aapka content aisa hona chahiye jo logon ko pasand aaye. Aur aap aisa kuch kar sakte hai ki log jo sawaal online pooch rahe hai uska jawaab unko de sakte hai ya koi solutions provide kar sakte hai. To aapki visibility logon ki nazar mein badhegi. Aur aap unhe aapke page ko follow karne ke liye bhi keh sakte hai.

5. Analyze kijiye aur test kijiye
Apne traffic ko analyze kijiye. Jo bhi log aapke page par visit kar rahe hai ya engage kar rahe hai aapke content par unko analyze kijiye. Isse aapko pata lagega ki kaunsa content logo ko pasand aata hai aur kis tarah se users ko engage kiya jaa sakta hai. Analyze karne ke liye kaafi saare free aur paid tools available hai. Jaise Google analytics ka free aur paid version dono available hai. Uska istamaal kijiye.

6. Engage kijiye apne customers ke saath
Apne followers ke saath aapko engage karna padega. Ek to aapko regulary content update karte rehna padega. Aur dusra aapke content par jo comments wagehra aa rahe hai unhe aapko respond karna hoga.
Content aap kaafi tarah ke bana sakte hai. Jaise youtube ke liye video content, facebook pe mainly images aur writtent content wagehra.

Social media marketing mein engagement ka matlab kya hota hai?
Engagement ka matlab hota hai jab users aapke content ke saath actively engage karte hai. Jaise aapne ek post publish ki to kuch log honge jo aapke post ko sirf dekhenge aur kuch log honge jo use click karenge, like karenge ya comment karenge..to wo hoga engagement. Jab bhi aap koi campaign chalate hai social media sites par to aapko unke results mein engagement rate show karega matlab ki kitne logon ke aapke content ke saath engage kiya.

Social media ki reach ko badhaane mein mobile phones ka bahut bada yogdaan hai. 3 billion se bhi zyaada log duniya bhar mein internet par active hai. 5.7 billion log Mobile devices ka istamaal karte hai. Mobile ka media consumption jaise ki audio streaming ya mobile videos bahut tezi se badh rahe hai.

Social media marketing mein normally 2 tarah ke strategies apnai jaa sakti hai. Matlab ki 2 tarah se companies iska fayda utha sakti hai, wo hai passive approach apna ke aur active approach apna ke.

Passive approach
Pehle passive approach kya hota hai wo jaan lete hai. Dekhiye social media customers ke liye marketing information ka ek useful source ho sakta hai. Blogs, content communities aur forums aise platforms hai jahan par customers apne reviews, recommendations wagehra share kar sakte hai. To companies apne customers ki rai jaanne ke liye iska istamaal kar sakte hai. Is tarah se dekha jaye to social media ek bahut hi sasta madhyam hai market intelligence ka. Iske zariye managers aur marketers customers ki problems ko track kar sakte hai aur identify karke unko respond kar sakte hai.

Agar ise traditional market research ke tarike se karne jaaye to surveys, focus groups aur data mining wagehra karni padegi jo bahut hi time consuming, costly method hai. Aur result jaanne mein bhi samay lagega.
To ye tha passive approach

Active approach
Active approach jaan lete hai ab. Social media ko aap communication channel ke roop mein bhi use kar sakte hai aur specific audience ko target kar sakte hai.

Ab dekhiye social media sites par kaafi log apne kuch personal information share karte hai jaise ki age, occupation, gender, location etc.

To advertisers apne ads ko specific demographic group ke liye target kar sakte hai. Iske liye wo Digital tools jaise ki Google Adwords ka istamal kar Sakte hai. Companies social media influencers ka bhi istamaal kar sakte hai apne marketing mein. Jaise ki famous bloggers aur vloggers. Politics mein bhi social media marketing ka bahut zyaada istamaal hota hai aaj kal jaise ki hamare prime minister Modiji ne bharat ke young aur urban population tak apne campaigns ka prachaar karne ke liye iska istmaal kiya hai. US ke president Donald trump ki jeet mein bhi social media campaigns ka kaafi istamaal hua tha.
To ye tha active approach.

Social media marketing mein aapka content ek bahut hi zaruri hissa hai. Kisi company mein normally Creative/marketing team content plan karke banati hai aur phir usse approval ke liye send karti hai

Aaiye aapko thoda mai examples ke zariye guide karta hun ki kaise aap social media marketing ke liye content bana sakte ho:
Agar aapka main content video hai to Youtube aur linkedin aapko suit karenge. Facebook par bhi aap videos daal sakte ho waise. Videos mein normally aapka average view duration accha hona chahiye. Average view duration yaani kitne samay tak users aapke video ko dekhte hai. For example agar aapka video 10 minute hai to kuch users ho sakta hai 2 min dekhte ho kuch 9 min. Aise hi jitne views aayenge unka ek average view duration banega. To average view duration jitna zyaada hoga utna accha hai. Uske liye aapko obviously video aisa banana hoga ki log acche se samaj paye aur bore bhi na ho.

Agar aapke content images hai to aap instagram aur facebook ka istamaal kar sakte hai. Jaise for example aap jo business ko promote karna chahte hai usme product hai shoes. To aap shoes ke images wagehra daal sakte hai.

Agar aap professionals ke liye koi service ya training ya certifications provide kar rahe hai to linkedIn badhiya madhyam rahega iske liye. Aap waha par short videos aur posts daal sakte ho. Aap jo bhi sell kar rahe ho usme ka agar thoda sa content freely provide kar sakte ho to badhiya hoga, kyunki phir user attract hoga premium content ke liye.

To doston umeed hai Social media marketing ke baare mein kaafi cheezein aap jaan paye is video mein. Par ye to sirf introduction tha iska. Mai aapke liye isse related aur bhi videos banaunga jisme aap seekhenge social media marketing ke kaafi techniques. To video acchi lagi to like kijiye aur share zarur kare sabke saath. Milenge next video mein jald hi dhanyawaad.

Add a Comment

Your email address will not be published. Required fields are marked *