Leader vs manager in Hindi | Kya har manager mein leadership skills hoti hai?

Doston hum leadership qualities ki baat karte hai kaafi baar. Lekin organizations mein jo managers hote hai unme kitno ke paas leadership qualities hoti hai. Bahut kam na. Zaruri nahi ki ek accha manager ek accha leader bhi saabit ho. Sirf logon ko acche ko manage karne se koi manager apneaap leader nahi ban jaata. Kaafi cheezein hoti hai jo ek manager ko leader banaanti hai. To kya hai wo cheezein jo ek leader ko manager se alag banati hai.

Aaj is video mein isi ke baare mein mai aapko samjhaunga. Puri koshish karunga ki aapko simple tarike se explain kar paun. To dhyaan zarur dijiyega please.

Managers kehte hai ye karo par leaders bataate hai aise karo-
Managers jo hai wo normally batayenge aapko ki ye cheez kar do, unko bas kaam nikalwana hai. Jabki leaders aapko batayenge ki kaise aap koi kaam efficiently kar sakte ho. Agar aap kisi kaam mein phas gaye ho jaise koi dikkat aa rahi ho use karne mein to wo aapko guide karenge best solutions ke saath.

Managers directions dete hai aur leaders questions poochte hai
Managers apne team members ko directions dete hai ki aisa karo waisa karo but kaafi baar unko problem ki root cause ka pata nahi hota. Agar koi problem pehle bhi aai hui hai to shayad unke ye directions kaam kar jaayen lekin agar problem ka kaaran is baar kuch alag hai to unke directions kaam nahi aa paate. Aise case mein ek leader questions poochta hai apne team se. Wo problem ki root cause yaani jad pata karta hai. Aur problem ki jad kya hai ye pata lag gaya to solutions behtar diye jaa sakte hai.

Managers ka style authoritarian ho sakta hai. Leader ka style motivational hota hai
Managers ki mentality boss type ki ho sakti hai. Wo apne team members ko authoritarian style mein manage karte hai. Authoritarian matlab..jaise ye kaam kal tak ho jaana chahiye. Ye kaam hua kyu nahi ab tak..mujhe pata nahi, kuch bhi karke ise complete karo jaldi.

Jabki leaders ka style motivational hota hai. Wo apne aapko team members ki jagah rakhkar sochte hai ki inko kya dikkat aa rahi hai. Kya problems aapko aa rahi hai is kaam ko karne mein. Ohh tum yaha par galati kar rahe ho.
Agar kisi kaam mein kuch delay ho raha hai to wo reasons ko samajkar team ko motivate karte hai use solve karne ke liye. Koi baat nahi guys hum ise milkar solve karenge aur deadline meet karenge. Ye kuch solutions ham implement kar sakte hai ise jaldi karne ke liye ye cheezein try karte hai.

Managers ke paas subordinates hote hai jabki leaders ke paas followers hote hai-
Team members manager ko follow nahi karte hai normally kyunki managers unko subordinates ki tarah treat karte hai. Wo chahte hai ki team members waisa ki karen jaisa wo chahe. To mostly team members unko pasand aur follow nahi karte. Jabki leaders ke motivational aur problem solving tarike unko aakarshit karta hai follow karne ke liye. Leaders ka ek alag charisma bhi hota hai jiski wajah se wo unhe follow karte hai.

Managers ke paas acche ideas ho sakte hai. Par leaders acche ideas ko implement karte hai
Managers ke paas ideas ho sakte hai par use implement kaise karna hai iska idea unko nahi hota jabki leaders ke paas ideas to hote hi hai aur saath hi wo team members ke saath sala mashauhra karke behtareen ideas chunkar use implement karne mein bhi aham bhumika nibhaate hai. Wo thik se samajte hai ki iske kya pros aur cons hai.

Managers change ko react karte hai jabki leaders change create karte hai
Managers change ko utna pasand nahi karte, agar work process ya policies mein changes ho to koshish karte hai usme adapt hone ki. Wo zyaada changes recommend bhi nahi karte hai. Bas jo chal raha hai chalta rahe aisa. Leaders jo hai wo acche ke liye change recommend karte hai aur implement karte hai. Wo analyze karte hai ki jo process abhi chal rahi hai kya isse bhi behtar kuch kiya jaa sakta hai

Managers logon ke upar apna power jataate hai jabki leaders logon ke saath milkar power develop karte hai.
Managers jaise ki maine bataya apne power ka istamal karke kaam karwaate hai. Jaise taise unko bas kaam nikalwaana aata hai. Jabki leaders logon ke potential ko pehchan kar apni team ko powerful banaate hai.

Managers jo hai wo goals create karte hai. Leaders vision create karte hai-
Managers jo hai wo focus karte hai goals ko set karne par phir use measure karne par aur phir use achieve karne par. Leaders jo hote hai wo ek picture paint karte hai apne dimag mein jo cheez unko lagta hai ki possible hai. Ek vision create karte hai. Aur apne team members ko direct karte hai is vision ko reality mein badalne ke liye.

Managers copy karte hai jabki Leaders unique hote hai
Managers mostly jo hai wo normally apne leadership ya function karne ke style ko dusron se adopt karte hai. Aur jo methods unko lagta hai ki pehle kaam kar chuki hai wahi implement karne ki koshish karte hai. Kuch cheezein copy karne ki koshish karte hai. Lekin leaders ka apna style hota hai leadership ka. Wo kaafi innovate hote hai. Agar unko lagta hai ki purane methods mein koi kharabhi hai ya weakness hai to wo naye methods banake use implement karne ki koshish karte hai. Matlab thoda out of the box sochte hai.

Managers short term effect ke baare mein sochte hai jabki leaders long term effects ke baare mein-
Managers normally agar koi solution implement karwa rahe hai to wo ispar zyaada focus karte hai ki bas abhi ke liye ye thik ho jaye aur customer ya client satisfy ho jaye. Yaani ki aisa solution jo short term ho to chalega, phir aage jaakar usme issues aayenge to phirse dekhenge. Jabki leaders ye poori koshish karte hain ki jo solution wo implement kar rahe hai uska long term mein koi nuksaan na ho. To wo kaafi bada sochte hai.

Managers apne existing skills ko use karte hai mostly jabki leaders naye skills bhi seekhne ki koshish karte hai-
Managers jo hai wo apne comfort zone se zyaada bahar nahi aate hai normally. Jo skills mein wo already acche hai uske dayre mein rehkar kaam karte hai. Ya phir usi skills ko aur polish karte hai. Leaders aisi bandish ko zyaada pasand nahi karte. Wo ane comfort zone se bahar nikalte hai jab bhi zarurat pade. Wo apne existing skills ko to polish karte hi hai saath hi jab bhi zarurat pade to naye skills seekhte rehte hai aur usse use karte hai apne kaam mein. Wo apne team members ko bhi naye skills seekhneka aur grow karne ka mauka dete hai ek learning atmosphere create karke.

Add a Comment

Your email address will not be published. Required fields are marked *