Lead Scoring kya hota hai lead generation mein?

Maine apne previous videos mein aapko lead generation ke baare mein kaafi important cheezein batai thi lekin doston kya aap jaante hai ki lead scoring kya hota hai. Aaj isi ke baare mein bataunga aapko is video aur blog mein bade simple tarike se

Lead scoring sales aur marketing ki ek methodology hai jo prospects ko rank karne ke liye use hota hai. Ab ye mat poochna ki prospects matlab kya? Clearly apne pichle video mein maine bataya hai ki prospect aur lead mein kya difference hai. Lead aur prospect dono hi potential customer hai lekin Leads to unqualified bhi ho sakte hai par prospects jo hai wo qualified hote hai. To Wo video dekhlo lead aur prospect ke difference ko detail mein samajhne ke ke liye. Haa to lead scoring mein hum prospects ko rank karte hai. Ye ranking ek scale ke against hoti hai jisme har lead jo value represent karta hai ek organization ke liye, wo hota hai usme.

To aisa keh sakte hai ki lead ko score pradaan karke ye ranking ki jaati hai. For example leads ko points assign kiya ja sakta hai score dene ke liye jaise A, B, C, D ya unko hot, cold ya warm jaise tags diye ja sakte hai.

Wo score hota hai aapke ranking methodology ke aadhar par, jo bhi method aap follow kar rahe hai uske anusaar aap unko score dekar rank karoge. Phir unko priority di jaati hai engagement ke liye. Jaise for example agar sales team inko call karegi to score ke anusaar priority degi aur jinko zyaada score hai aur jo ranking mein unke anusaar upar hai unko pehle call karegi.

Lead scoring se kya hota hai ki jo prospect hai uske experience ko business customize kar sakti hai ye pata karke ki wo kaunse buying stage aur interest level par hai. To in leads ki quality aur readiness ko improve karke sales organization ko diya jaata hai followup karne ke liye. Wo customer ki situation ko acche se samaj ke unko apna product offer karegi, to aise mein us potential customer ke customer banne ke chances bhi bahut zyaada badh jaate hai.

Doston dhyan zarur dete rahiye kyunki lead scoring ke baare mein aur kuch interesting cheezein bataunga aapko-

Lead scoring ke fayde yaani benefits kya hai:

1. Sales ki efficiency aur effectiveness improve hoti hai:
Doston lead scoring sales ka dhyan aise leads par dilwata hai jo organization ke liye behad valuable hai. Lead scoring se wo leads filter out ho jaate hai jo ki unqualified hote hai ya kam value wale hote hai. To isse time bhi kaafi bachta hai na. To ye sales ki jo efficiency aur effectiveness hai use improve karta hai. Warna bahut time waste ho jaata hai unqualified leads ko contact karne unse equiry karne mein.

2. Marketing ke effectiveness ko increase karta hai:
Lead scoring se marketers ko leads ke characteristics ke baare mein jaane mein aasaani hoti hai. Wo sirf aise leads le sakte hai jinke characteristics unko valuable lagte hai aur wo unko target kar sakte hai marketing mein. Aur phir isse wo aur high quality leads sales tak pahuncha sakte hai.

3. Marketing aur sales ke relationship ko strong banata hai.
Lead scoring se marketing aur sales ke beech ka relationship strong hota hai. Wo aise ki dono ke beech ek common cheez discuss karne ke liye ho jaati hai. Wo hai generate hue leads ki quality aur quantity discuss karna.

4. Revenue increase kar sakta hai:
Lead scoring se jo leads apne scores se qualified hue hai unpar pehle kaam kiya jaata hai. Jo leads ke zyaada scores honge unke close hone ke zyaada chances hai lower score wale leads ke mukaable. To ye organization ki revenue growth mein bhi kaargar saabit hota hai.

Ye the fayde lead scoring ke. Doston aaiye ab dekhte hai lead scoring ke kuch methods jo normally follow kiye jaate hai.

Lead scoring ke methods

1. Lamb ya Spam:
Ye method zyaadatar small businesses apnate hai jinke paas clear ideal customer profile nahi hai. Lamb ya spam model mein low quality leads ko filter kiya jaata hai aur high quality leads ko chuna jaata hai.

Low-quality leads ko online businesses se pehchana jaata hai personal email address domains se jaise (gmail, hotmail, yahoo) ya temporary email generators se jo email spam karte hai ya anonymously sign up karte hai. High-quality leads ko unke corporate email domains aur firmographic data points jaise jobitle aur company size ke dwaara pehchana jaata hai. To is tarah se isme high quality leads ko pehchankar score dete hai.

2. Predictive Lead Scoring:
Haa ye wala bada interesting method hai. Machine learning aur Artificial intellgence ka istamaal abhi to ho hi raha hai par future mein kaafi hone wala hai to aap ise badi acchi tarah se samajh lijiye. Predictive lead scoring models mein machine learning ka istamaal hota hai ek predictive model generate karne ke liye historical customer data ke basis par jo third party data sources ke zariye milte hai. Isme past lead behavior ya past interactions jo hue hote hai company aur leads ke beech unko analyze kiya jaata hai aur ye pata karte hai ki us data mein koi positive correlations hai jo positive business outcome ko la sake jaise koi deal close hui ho past mein to abhi bhi us tarah try kar sakte hai.

Predictive Lead Scoring mein first party data – jaise ki internal marketing, sales & product data aur saath hi third party data jaise data enrichment aur intent data ka istamaal hota hai ek ideal customer profile ka machine learning model build karne ke liye. Predictive Lead Scoring models ka istamaal product-qualified leads identify, qualify aur engage karne ke liye bhi use hota hai jo user ke historical yaani pehle ke behavior se ye predicts karta hai ki kya ek user kisi amount se zyaada spend karega?

3. Rule-Based:
Is lead scoring model mein point values diye jaate hai lead ke firmographic aur behavioral attributes ko. Point thresholds isliye set kiye jaate hai ki lead good ya bad fit consider kiya jaa sake.
Rule based scoring solutions bade marketing automation platforms par kiye hue bhi hote hai aur add-ons ke taur par bhi implement kiye hote hai jaise lead scoring solutions Salesforce CRM ke liye.

Kaafi softwares mil sakte hai market mein jo rule based lead scoring mein madadgaar saabit ho sakte hai.

To doston aapne is blog aur video mein lead scoring kya hai wo jaana, lead scoring ke fayde dekhe, methods jo usme use hote hai wo jaana. To kaisa laga? Samajh mein aya na jo bhi bataya. Like aur share zarur karen sabke saath. Aur subscribe zarur kijiye hamare youtube channel career code ko

Add a Comment

Your email address will not be published. Required fields are marked *