CAT 2018 ke liye aakhri kuch din

Namaskar mitro mai hu Vicky aur haal kaisa hai aapka. Mitro Common Admission Test (CAT) 2018 ka date nazdeek aa raha hai. 25 November ko hai exam. 2 lakh se bhi zyaada log is exam ko dete hai 20 IIMs aur lagbhag baaki 100 B-schools mein admission paane ke liye. Tough toh hota hai yeh. Waise kam se kam 5-6 mahine pehle tayyari shuru karte hai to behtar hota hai.

CAT ke liye ab sirf 12 dine bache hue hai. Aise mein ho sakta hai ki kaafi log stress le ya panic kare jo ki thik nahi hai. Toh aise mein aapko aaiye mai kuch general advice de deta hu jo mai umeed karta hu ki in last days mein aapke liye helpful rahenge.

1. Padhai ke chakkar mein health ko andekha mat karo. Oily food/ Junk food jitna ho sake avoid kare kyuki isse aalas aa sakta hai. Ghar ka bana paushtik khana khaaye. Paryapt paani pijiye.

2. Apne aas paas ek accha vataavaran baanaye rakhe. Acche vatavaran se mera matlab hai distractions se door rahe, positive sochiye, stress mat lijiye, khush rahiye.

3. Acchi neend lijiye. Jaldi uthiye aur koshish kare jaldi sone ki. Aur exam ke pehle bhi acchi neend lijiye. Der raat tak mat padhiye. Exam mein fresh rehna zaruri hai warna silly mistakes ho sakte hai.

4. Apne man ko shaanth rakhiye aur bharosa rahiye apne aap par, apni mehnat par. Zyaada door ke baare mein mat sochiye. Mera matlab hai aksar ham future ke baare mein sochne lag jaate hai aur present par focus nahi kar paate. Toh present par apna focus rakhiye.

5. Ho sake to naya topic start mat kijiye. Agar aapke bahut saare topics cover ho chuke hai to pehle unko revise kijiye. Ab jo ki sirf 2 hafte bache hai to aise mein aap naya topic shuru karenge to kaafi maatha pacchi hogi, kaafi samay aapka jaa sakta hai use samajhne mein.

6. Apne strengths par focus kijiye. Aap jin topics mein strong hai use acchi tarah se practice kijiye.

7. Formulas aur concepts ko revise kijiye.

8. Mock tests dijiye jitna ho sake. Kaafi online mock tests bhi hai. Pichle year ke CAT papers ko revise kijiye. Isse aapki exam dene ki strategy tayyar hogi.

Mitro CAT preparation ke ye jo kuch abhi din bache hai isme ho sakta hai ki aapko kabhi frustration feel ho ya kaafi bhaar lagne lage zimmedariyon ka. Par chinta bilkul mat kijiye. Apne aap par vishwas rakhiye. Darne ki bilkul bhi zarurat nahi hai, aakhir ek exam hi to hai. Bas apna best dene ki koshish karo. All the best.

Leave a Reply