Career kaise chune?

Kya aapko bhi career mein confusion hai, aur kuch interesting karne ka man hai? Log aksar mujhse poochte hai ki hum apna career kaise choose kare? Kaise pata karen ki hamare liye kaunsa career ya course suitable rahega. Bahut confusion hota hai logon ke man mein. Aur ye normal bhi hai, kyunki hum mein se kaafi logon ko school aur college career counselling ya guidance pradaan nahi ki jaati hai aur pradaan karte bhi hai to thik se batate nahi hai. Dekhiye waise career choose karne ka final decision to aapka hi ho sakta hai. Log aapko options bata sakte hai thoda bahut guide kar sakte hai lekin aapse behtar aur koi nahi jaan payega ki aapko kya karne me maza ayega. Aaj is video mein mai aapse share kaunga 8 aisi cheezein jo career choose karte waqt aapko apne aap se poochna chahiye. Aur doston ho sakta hai ki ye aathon cheezein ka perfect jawaab aapko nahi mil paye lekin koshish karen ki inme se zyaadatar cheezon ka aapko satisfactory jawaab mil jaye. Kyunki sabhi cheezein perfectly dekhne jayenge to ho sakta hai ki koi career shortlist hi na kar paao. To aaiye shuru karte hai.

https://youtu.be/0ppv0qs8Ti4

1. Kisme aapki ruchi hai aur kya karne se aap free mehsoos karoge
Doston hum kaafi baar aise jobs le lete hai jo hame karna pasand to nahi hai lekin phir bhi karte hai kyunki hamare dost wo kar rahe hai ya kaafi aur reasons bhi ho sakte hai. Par kuch samay baad jab us job ko chod nahi sakte to bandhe hue mehsoos karte hai. Sabse pehle to ye samaj lijiye ki aapko kya karna pasand hai aur kisme aapki zyaada ruchi hai. Haa mai jaanta hu ye kehna aasaan hai par kaafi baar hona utna aasaan nahi hota. Kyunki kaafi baar aisi cheezein hoti hai jaise ki financial problems jo hamare control mein nahi hoti. Lekin isiliye mai aapse yeh kehta hun ki jitna aapse ban pade utna. Har kisi ki situation alag hai, to mai har kisi ke liye ek jaisi advise to nahi de sakta. Isiliye jitna aapke situation ke anusaar ban sake utna koshish karen ki aapke interest ka career aap choose kar sake. Aur kisi kaaran se nahi kar paye ho to nirash mat hona kyunki aapko aage bhi auke milenge apne khali time mein wo cheezein karne ke.

Kuch to aisi cheezein hongi jo karte waqt aapka focus accha rehta hai uspar. Jaaniye ki wo kya hai? Agar bahut hi confused ho aur tay nahi kar paa rahe ho ki konsa zyaada pasand hai aapko to ek aisi list banao occupations ki jo aap explore karna chahte hai. Dekhiye ek to ye hota hai ki hum apne interest ko pehchane par us interest ko pehchaane ke baad hume ye bhi to pata hona chahiye ki usme kya opportunities available hai. Kya professions available hai us cheez mein. To ye jo aap list banaoge, ise match karna apne strengths ke saath aur. Aur jo bhi occupation zyaada apke strengths ke saath match ho rahe hai unko shortlist karna. Phir research karna un occupations ke baare mein ki unme kaunse opportunities available hai aur aapke requirement ko kaunsa zyaada suit ho raha hai. Hum sab freedom chahte hai apne kaam mein. Bandha hua mehsoon nahi karna chahte hai.

2. Aapka talent kya hai
Kis cheez mein aap acche hai. Kya aisi koi cheez hai jo aap bahut hi effortlessly kar lete ho. Zara Sochiye is baare mein. Waise zaruri nahi ki aapko pata ho aapka talent kya hai kyunki agar aapko wo cheez karne ka mauka hi nahi mila hai ab tak, jisme aap acche hai to aapko pata kaise chalega. Isliye jo pasand hai kuch baar karke dekhlo ki tum usme acche ho ya nahi. Aur ek baat, zaruri nahi ki har kisi mein koi ek exceptional talent ho. Kaafi log thodi thodi ruchi saari cheezon mein dikhaate hai aur usme acche bhi ho sakte hai. To aap bas apne creativity ya jo bhi skill hai use express karte rahiye. Aur jitna ban pade explore karte rahiye, try karte rahiye wo cheezein jisme aapko lagta hai ki aap badhiya kar sakte ho. Jitna ban pade isliye kaha kyunki mai jaanta hu ki kaafi aise bhi interests ho sakte hai jo paise ki kami ki wajah se aap explore na kar paao.

3. Kaunse skills aap istamaal karna chahte ho-
Ho sakta hai ki aapko kaafi saari cheezein aati ho. Lekin ye sochiye kaun kaun se skills apne career mein aap istamaal karna chahte ho. Time management karna hoga aapko yahan. Agar aap apne sabhi skills ko ek samaan time nahi de sakte to apne kuch aise skills par focus kar lijiye jo aap chahte hai apne career mein aage kaafi istamaal karne ka. Jaise for example agar aapko likhna pasand hai aur aap ise itna pasand karte hai ki aap chahte hai ki ye aapka career hi ban jaye. Phir chahe wo job ho ya business. To aap likhne se related jobs le sakte hai. Jaise blogs likhne ka, articles likhne ke jobs. Basically content likh sakte hai aap. Phir aap apne content ko is tarah se likhne ki koshish karen ki search engines mein aapka content kaafi keywords ke liye upar aa jaye. Aur aise aap phir aage jakar freelancing services provide kar sakte ho writing se related. To ye to sirf ek example tha, waise writing ke aur bhi types hai. Aur aise hi aap sochiye ki wo kaunsa ya kaunse skills hai jo aap career mein istamaal karna chahte ho. Aur jis field mein aap jaana chahte hai uska Competition bhi check kijiye. Kya wahan par bahut hi zyaada bheed hai. Aur aap kya us competition mein sustain kar paoge. Agar aapko lagta hai ki us competition mein aapka career banane ke chances bahut kam hai to dekhiye ki aapke skills ke anusaar kaunse field hai jahan par competition kam hai.

4. Kaunsi industries mein aap interested hai-
Waise industries to bahut saare hai. Manufacturing industry, IT industry, Telecom industry. Par aap kis industry mein zyaada interested hai? Us tarah se sochiye. Ek list bana lijiye jin bhi industries mein aap interested hai, phir aapko unme se kuch industries shortlist karni padegi jo aapke skills ke anusaar zyaada badhiya opportunities provide kar rahe hai.

5. Aap apne kaam ke zariye kaunse values darshana chahte ho-
Kuch aisi cheezein hongi jo aap contribute karna chahte ho samaaj mein ya sudhaarna chahte ho ya agar koi cheez aap chahte ho ki thik se honi chahiye kisi industry mein ya society mein wo konsi cheezein hai ye sochiye. Apne values ko aap hi acchi tarah se jaan sakte hai. Un values ko aap apne kaam mein darshana chahte honge. To sochiye ki kaunse hai wo?

6. Kis tarah ka work environment aap chahte ho-
Aapko kis tarah ka work environment pasand hai? Har career mein apne alag tarah ke work environment hote hai. Sabhi logon ko sabhi tarah se environment suitable nahi hote hai. Jaise for example Flexible environment kaafi logon ko pasand hota hai. Yaani ki apne comfort ke anusaar kaam karna. To dekhiye ki kaunse aise career hai jahan par aapko atleast thodi to flexibility milegi. Aapko travelling pasand hai alag alag cities mein to aisa career chune jahan aapko badhiya locations mein travel karne ka mauka mile. Doston work environment kaafi zaruri hota hai kyunki aap apne din ke kaafi ghante apne work place par bitaoge. To wo aisa hona chahiye jaisa aapko accha lage.

7. Aapka mission kya hai?
Aage jaakar kis tarah ke career mein aap long term ke liye rehna chahoge ye aap kaise janoge? Haan mai jaanta hu shuru mein ye sochna thoda mushkil hoga kyunki hume experience nahi hota aur hum kaafi cheezein explore karna chahte hai. Explore zarur kare par saath hi ye bhi sochiye ki kya ye career aap long term mein pursue karna chahenge? Agar nahi to jo bhi career aap pursue karna chahte hai long term ke liye uske baare mein research karke ye pata kijiye ki kaise aap us career mein aage badh sakte hai. Lekin doston long term ke chakkar mein short term goals ko bhool mat jaana. Matlab ye ki long term goal sochlo zarur but waha tak pahuchne ke liye to short term goals lagenge na. Jaise jo chote chote steps aap loge apni learning ke liye ya experience paane ke liye un apna focus rakhiye. Warna kai log sirf long term goal soch lete hai aur umeed karte hai pahunch jayenge waha. Aapko banne se zyaada karne par dhyaan dena hoga. Karoge tab hi to banoge. Abhi aap jo bhi seekh rahe to use poore focus ke saath enjoy karke seekhne ki koshish kariye.

8. Kitni salary se khush rahenge aap?
Dekhiye aisa bhi ho sakta hai ki aapko jo career pasand hai usme salary thodi kam mil rahi ho aur jo kaam aapko pasand nahi hai lekin salary usme thodi zyaada mil rahi ho. To aise mein aapko ye thik se samajhna hoga ki kitni salary se aap khush reh paoge. Obviously ye zaruri nahi ki kisi career mein agar starting salary kam hai to aage ki salary bhi kam hogi, aisa nahi hai. Kuch careers mein starting salary kam ho sakti hai lekin experience ke baad kaafi zyaada bhi ho sakti hai. Par decision aapko hi lena padega ki kitni salary mein aap khush reh paoge. To aapko jo career pasand aya hai usme aapko aise opportunities dhoondhne padenge jahan par aapko jitni salary chahiye utni mil rahi ho ya milne ke chances ho. Financially strong hona bhi important hota hai taaki aap jo chaho wo freely kar sako. Agar aap financially apne aapko strong karne par focus karna chahte ho to zarur kijiye. Kaafi baar hamaare interest wale career mein ho sakta hai ki paisa utna mil nahi raha ho. To aise mein aap sochiye ki kya tarike hai jisse aap financially apne aapko strong rakh paye aur jisme interest hai wo bhi kar paye. Jaise for example fiancially strong hone ke liye jo kaam aap kar rahe ho use jaldi niptake baaki ka samay apne interst par de paao. Aisa kuch.

Doston mai bas yahi chahta hu ki aap darr ke mat jio. Khulke jio. Job ka darr, career ka darr ya business ka darr ye cheezein log sochkar aksar depress ho jaate hai. Aap log aisa baniye ki ye saari cheezein aapko dara na sake. Koshish kare apne time ka sahi use karne ka. Aaj abhi jo bhi aap kar rahe ho, use poore man se karne ka. Jo bhi karna chahte ho wo karte samay badhiya mehsoos ho. Dar ke ki gayi cheezon mein na to maza hai aur na to fayda. Aur haan broad sochna, matlab sirf apne hi chote se problem ke baare mein sochkar udaas mat rehna. Aisa sochna ki kaise aap apne aapko is tarah banaye ki aap khudke problems to solve kar hi paao par dusron ke liye bhi kaafi helpful insaan banke unbhro. Aur dheere dheere jaise aap career mein grow karte jaoge to koshish karte rahe ki aap jo aajke problems hai aapke aaspaas unke liye kuch solution sochkar implement karne ka. Meri shubkaamnayen aapke saath hai. All the best. To doston ye kuch tarike the career ki thik tarah se choose karne ke liye par aage aur tips bhi share karta rahunga aapke saath. Video acchi lagi to like kare aur share zarur karen apne doston ke saath aur milenge next video mein jald hi Dhanyawaad.

Add a Comment

आपका ईमेल पता प्रकाशित नहीं किया जाएगा. आवश्यक फ़ील्ड चिह्नित हैं *