Kya Boss ki CHAPLUSI karni chahiye?

Kya aapko aapke boss ki chaplusi karni chahiye?

Waise Chaplusi ka matlab kya hai? Kisi ko khush karne ke liye jhooti ya zarurat se zyaada taarif karne ki kriya hoti hai Chaplusi. Dekhiye mere anusaar to chaplusi waise kisi bhi nahi karni chahiye phir chahe aapka boss ho ya senior ho ya koi rishtedaar.

Par kuch logon ko aapne dekha hoga ki wo chaplusi karte hai. Waise yeh unka personal choice hai. Jo log karna chahte hai unko karne dijiye, aap ignore kijiye. Lekin aap agar apna bhala chahte hai to chaplusi jaisi cheez se door rahenge to behtar hoga.

Kyu? Dekhiye jo log chaplusi karte hai unko lagta hai ki isse unko koi fayda hoga jaise ki promotion, increment ityadi. Lekin zyaadatar cases mein aisa kuch nahi hota balki wo kaafi kuch kho dete hai. Apna nuksaan kar baithe hai. Kuch chote fayde unko jo abhi dikh rahe honge jaise ki Boss khush ho raha hai ya do chaar paise ki increment lekin aage jaakar ye bhi nuksaan mein badal sakta hai. Jaanana chahte ho ki kya nuksaan kar baithe hai log chaplus bankar?

1. Apni self respect kho dete hai wo
2. Apne doston ya colleagues ke saamne bhi respect kam ho jaati hai unki. Unke rishte doston ke saath kharaab ho sakte hai.
3. Unka growth ruk jaata hai. Kyunki unka dhyaan to chaplusi par hai, to wo apne skills par kam focus karte hai.
4. Unka boss unki utni value nahi karta. Aapko lagta hoga ki chaplusi karne se boss unki value karega par aisa nahi hai. Ho sakta hai kuch bosses isse khush ho jaate ho lekin phir bhi wo unki value nahi karenge, kyunki unko pata hai ki chaplus to apne piche ayega hi.
5. Office politics mein wo involve ho sakte hai. Dekhiye chaplusi karte karte wo aaj nahi to kal office politics mein involve ho jayenge jisse unka jo main kaam hai office mein usse unka dhyan hat jayega.
6. Personal life disturb ho jaati hai. Boss ko jab koi bekar ke kaam karwane hote hai na to chalpuson ki madad lete hai woh.
7. Dhyan rahe ki chaplusi ek aadat mein bhi badal sakti hai jisse ki wo har jagah jahan mauka mile chaplusi karne lag sakte hai.
8. Aur yaar chaplus kehlana kaun pasand karega? Itna bekar ka stress lena hi kyun?

Kaafi logon ko yeh baat bahut der se samaj aati hai. Jab kaafi saal chaplusi karne ke baad bhi kuch khas hasil nahi hota tab khayal aata hai ki arre yaar bekaar mein hi waqt barbaad kiya. Kitna kuch tha life mein karne ke liye aur kia kya? Boss ki Chaplusi.

Chaplusi karna ya na karna yeh totally ek individual par depend karta hai. Koi usko force nahi kar sakta chaplusi karne ke liye aur na to koi usse force kar sakta hai chaplusi chodne ke liye. Iske jo bhi nuksaan hai wo toh unko bhugatne padte hai.

Is video ka motive tha aap logon ko ye bataana ki chaplusi karne se kya kya nuksaan ho sakte hai professional aur personal life dono mein hi. Aap logon ka ispar kya vichar hai doston? Hame zarur bataye comments mein.

To mitron video acchi lagi to like aur share zarur kijiye. Aur subscribe to kar lia hoga na?

Add a Comment